غاوي اليتبع الشاعر

غاوي اليتبع شاعر

عليج وبلشعر ما اكتب شلون
وانتي بنيه حلوه وبيد شاعر

متوصفج قصيده شتوصف العين
وعينج بلوصف تترس دفاتر

يلعينج مدينه ورمشج جيوش
وعلى حدود المدينه الجيش داير

شردت كلهه منج ما بقت ناس
اظن جي شافو جفونج سواتر

الحواجب مو حواجب من تزعلين
احس بركابنه يذبحن خناجر

عشكتج جن عشك كافر للصنام
بعد حبج صنم وبراس كافر

بيه شسوه شوكج وانتي تدرين
ما تدرين وانه لهاي عاذر

اذا تمشين عني وغفله ترحين
اجي لاول قطار وبي اسافر

واذا باجر تجين يجيبني الشوك
ونكعد علدرب ونتاني باجر

بمحرم من اشوفج والتقي وياج
اخلق عيد الج لو يوم عاشر

اكلهم ما احبج وانتي بلروح
واكلهم صمت عنج وانه فاطر

غاوي اليتبع شاعر يكولون
اليتبعج غوه شيصير شاعر

افكر بيج بلصف والدرس فات
تسجل اسمي غايب وانه حاظر

واسكر بيج واثمل من يجي اليل
بلصفنات كاس بكاس اكاسر

تكرهه الكنطره لو غيرج يفوت
وجدمج جي حلو تلحكه الكناطر

شمس كل راحه بيدج تضوي بلايد
وكواكب ربج مسوي الاظافر

وبعد ربج شسوه سوه دولاب
اخاف احجي وعلي يحجون حاير

من تمشين تبعنج خيالين
خيال بصف خيالج انه صاير

اخابر مو عليج وانتي بلبال
وطلعت اعليج ما ادري امن اخابر

كاتبلج دفاتر مالت اشعار
ولج نصين شكني الدفاتر

اذا تطلعين غفله ومو بلاذان
تسجد للارض كل المناير

ويشوفونج شمس تمشي على الكاع
واحد يسال الثاني شصاير

تدخلين الفرعنه وناسنه تدوخ
ويظل حتى الفرع يشرب جكاير